1 Mehr / 23 Sentyabr – İranda Farsdilli Təhsil İlinin Açılışı ilə Bağlı
Uluslararası QDT- lərə və İlgili Orqanlara Çağırış
(Güney Azərbaycan Qurtuluş Partiyası)
Sayğı dəyər BMT, UNESCO, Amnesty International və bütün insan haqları təşkilatları!
1 Mehr günü İranda yeni məktəb dönəmi başlayır. Bu gün milyonlarla qeyri-fars uşaqlar üçün bayram deyil, assimilyasiya və mədəni soyqırımın davam etdiyi qara gündür.
İran İslam Respublikası ən azı 40 milyon Azərbaycan türkünü, həmçinin kürd, ərəb, bəluç və digər millətlərin övladlarını ana dilində təhsildən məhrum edir. Məktəblərdə yalnız fars dili tətbiq olunur. Bu, İran dövlətinin təkcə öz konstitusiyasına deyil, aşağıda sadalanan beynəlxalq hüquqi sənədlərə də kobud şəkildə ziddir:
- İran İslam Konstitusiyasının 15-ci maddəsinə,
- UNESCO-nun “Ana dilində təhsil” prinsiplərinə,
- BMT-nin Mülki və Siyasi Hüquqlar haqqında anlaşmasına.
Bu siyasət yalnız ayrı-seçkilik deyil, uluslararası hüquqa görə açıq şəkildə kütləvi mədəni soyqırımdır.
Eyni zamanda, Azərbaycan türklərinin milli simvolu və dünya irsi olan Urmu gölü dövlətin planlı siyasəti nəticəsində qurudulmaq üzrədir. Bu həm də böyük bölgəyə qarşı ekoloji cinayətdir və milyonlarla insanın həyatını təhlükə altına alır.
Biz – Güney Azərbaycan Qurtuluş Partiyası (GAQP) – beynəlxalq ictimaiyyəti təcili tədbir görməyə çağırırıq:
- İran rejiminin ana dili yasaqlarına qarşı kəskin mövqe və davamlı təzyiq göstərin;
- Urmu gölünün qurudulmasını və ana dilinin yasaqlanmasını bəşəri cinayət kimi tanıyın və bunu rəsmi şəkildə dünyaya elan edin;
- İran dövlətinin bu siyasətlərinə dəstək verən qüvvələrin məsuliyyətini beynəlxalq müstəviyə çıxarın.
Biz inanırıq ki, insan haqlarını və barışçıl yaşamı qorumaqla məsul olan qurumların bu açıq pozuntulara səssiz qalmaması önəmli nəticələr verəcəkdir.
Güney Azərbaycan Qurtuluş Partiyası (GAQP)
16 Sentyabr 2025
