Çağırış
Sayın xanımlar, beyler, davadaşlar,
Azer ayı Güney Azərbaycanın tarixində yalnız xüsusi bir yer tutmur, həm də bizdə dərin duyğular oyadaraq mübarizəyə səsləyir. Bu il 21 Azer Milli Hökumətinin quruluşunun 80. illiyidir. Elə bu günlərdə Güney Azərbaycan Ulusal Türk Hərəkatı çətin və çalxantılı bir dövrdən keçir.
Vətəndə, yurdumuzun igid övladları İranın fars molla rejiminin işğalı altında haqsız yerə zindana atılıb, illərlə azadlıqlarından məhrum ediliblər. Özlərini müdafiə etmək, boğulan səslərini dünyaya duyurmaq üçün əllərində olan yeganə silaha, yəni canlarına sarılaraq ölüm orucuna başlayıblar. Onlar bizik, biz də onlar. Onları düşmənin qılıncı önündə müdafiəsiz qoya bilmərik, qoymamalıyıq.
Biz birlikdə olmalı, gücümüzü bir yerə toplayıb millətimizin harayını dünyaya çatdırmalı, darda qalmış bir ULUS olduğumuzu uca səslə hayqırmalıyıq. Bu gənclər bizim xalqın övladlarıdır; onların sevinci də, ağrısı da bizimdir.
Onlar tək deyillər. Bunu göstərmək üçün müxtəlif dayanışma yolları ilə yanaşı, artıq meydanlara çıxmaq, ictimai etirazlara başlamaq zamanıdır. Yaşadığımız ölkələrdə heç olmasa 21 Azer günü İran adlandırılan irqçi fars molla rejiminin yuvaları, yəni səfirlikləri qarşısında toplaşıb, yalnız düşüncə ifadə etdiklərinə görə zindanda olan igidlərimizin azadlığa buraxılmasını tələb etməliyik.
Bu aksiyaların Ankara, Bakı, Berlin, Brüssel, Den Haag (Haaqa), New York və Stokholm kimi şəhərlərdə keçirilməsi son dərəcə uyğun və təsirli olar.
Hilal
27.11.2025
Köln, Almanya
