GAQP Stokholm tədbiri ilə bağlı beynəlxalq insan hüquqları qurumlarına rəsmi müraciət ünvanladı
Güney Azərbaycan Qurtuluş Partiyası (GAQP) Stokholmda keçirilmiş bir günlük aksiya və konfransla bağlı Birləşmiş Millətlər Təşkilatının müvafiq insan hüquqları mexanizmlərinə rəsmi bəyanat təqdim edib. Müraciət BMT-nin İnsan Hüquqları üzrə Ali Komissarlığına, İran üzrə Xüsusi Məruzəçiyə və Özünü Müəyyənetmə Hüququ üzrə Xüsusi Məruzəçiyə göndərilib.
GAQP məktubunda 13 dekabr 2025-ci ildə Güney Azərbaycan Təşkilatları Əməkdaşlıq Şurasının (GATƏŞ) təşəbbüsü ilə Stokholmda keçirilən etiraz aksiyası və konfrans haqqında ətraflı məlumat verilib. Bəyanatda tədbirin məqsədinin Güney Azərbaycanın siyasi mövqeyini beynəlxalq ictimaiyyətə çatdırmaq olduğu vurğulanıb.
Partiya məktubunda bildirir ki, “Güney Azərbaycanın məsələsi yalnız dil və mədəni hüquqlarla məhdudlaşdırıla bilməz, bu məsələ tam siyasi müstəqillik məsələsidir”. GAQP həmçinin İran həbsxanalarında saxlanılan yüzlərlə azərbaycanlı və qeyri fars fəalın durumuna diqqət çəkərək, bu vəziyyəti siyasi repressiya kimi qiymətləndirib.
GAQP beynəlxalq qurumları Güney Azərbaycanda insan hüquqlarının sistemli şəkildə pozulmasına münasibət bildirməyə və siyasi məhbusların azad edilməsi üçün təcili addımlar atmağa çağırıb.
GAQP – 2025
