Makuda güllələnən azərbaycanlı gənclərin kimliyi bəlli olub
Mayın 3-dən 4-nə keçən gecə Güney Azərbaycan Maku şəhərində kürd silahlı qruplaşmalarının atəşi nəticəsində yaralanan azərbaycanlı gənclərin kimliyi bəlli olub. Məlumata görə, Məhəmməd Hüseynəlizadə və Rza Hüseynəlizadə kürd silahlıları tərəfindən güllələniblər.
Rza Hüseynəlizadənin durumunun stabilləşdiyi, Məhəmməd Hüseynəlizadənin isə vəziyyətinin ağır olduğu və reanimasiya bölməsində saxlanıldığı bildirilir.
Qeyd edək ki, hadisəyə səbəb idman yarışında azərbaycanlı gənclərin milli şüarlar səsləndirmələri olub: “Azərbaycan var olsun, istəməyən kor olsun”. Azərbaycanın ərazi bütövlüyünü ifadə edən şüarlar səsləndirən gənclər silahlı mühacir kürdlərin hücumuna məruz qalıblar.
Yerli mənbələrin verdiyi məlumata görə, hücum edənlər İran təhlükəsizlik nazirliyi və SEPAH-la əməkdaşlıq edən etnik kürdlərdirlər.
