Uzun illər Amerikada yaşayaraq fəaliyyət göstərmiş, əslən təbrizli qarmon ifaçısı Əli Haqşünasın xatirə gecəsi, Bakı şəhərində, Rəşid Behbudov adına Dövlət Mahnı Teatrında keçirildi.
05.05.2025
Əli Əhməd oğlu Haqşünas 1961-ci ildə Təbriz şəhərində, çoxuşaqlı bir ailədə dünyaya gəlib. Atası əslən Həştərxandan, anası isə Gəncədən idi. 1989–1995-ci illər arasında Təbrizdə Əli Fərşbafın məktəbində qarmon dərsi deməklə bu ecazkar musiqi alətinin və zəngin xalq musiqimizin sirlərini gənclərə öyrədib. 2000-ci ildən etibarən həyat yoldaşı Rübab xanımla birlikdə ABŞ-a köçüb. Peşəcə kondisioner mütəxəssisi olsa da, klassik musiqimizin, bəstəkar və xalq mahnılarımızın vurğunu, tanınmış qarmon ifaçısı kimi yadda qalıb. Qarmonu heç bir müəllimin yanında öyrənmədiyi halda, “Qarmon məktəbi” adlı sanballı bir kitab müəllifi olub. Dəfələrlə Bakını ziyarət edib.
“Sənətin dili olmur”, – deyirlər. Lakin Əli Haqşünasın sənət dünyasının öz musiqi dili var idi. Onun sevimli ifaları arasında “Nazəndə sevgilim”, “Şeir deyilmi”, “Sən gəlməz oldun”, “İntizar”, “Ayrılıq”, “Qubalı qız”, “Qarabağ”, “Muğana ceyran”, “Məktəb illəri”, “Şikayətim var”, “Külək”, “Qarşımdan bir sona keçdi”, “Aldatmayaq bir-birimizi”, “Yar məndən incidi”, “Sənsiz”, “Sevgili canan” kimi mahnılar xüsusi yer tuturdu.
