تورکیه جومهوریتینده کی سون سیاسی گلیشمهلرله باغلی گونئی آزربایجان قورتولوش پارتیاسینین (گاقپ) بیلدیریسی
تورکیه جومهوریتی تورک میللتینین ایستیقلال ساواشی ایچیندن دوغموش، مصطفی کمال آتاتورکون اؤندرلیگینده میللی ایراده، خالق حاکمیتی، حقوق دؤولتی و چاغداش دؤولتچیلیک ایلکهلری اوزرینده قورولموشدور. بو جومهوریت یالنیز تورکیه تورکلرینین دئیل، بوتون تورک دونیاسینین قورور قایناغی و اورتاق قازانجیدیر.
بو گون تورکیهده یاشانان سیاسی و توپلومسال گرگینلیکلر، حقوقون اوستونلویو ایله باغلی آرتان قایغیلار، خالق ایرادهسینین و دؤولت قوروملارینین گله جگی اطرافیندا یارانان سواللار بیز گونئی آزربایجان تورکلرینی ده دوشوندورمکدهدیر.
دؤولت هئچ بیر پارتیانین، هئچ بیر چئورهنین و هئچ بیر شخصین مولکو دئیلدیر. دؤولت میللتین اورتاق وارلیغیدیر. حاکمیتین قایناغی ایسه یالنیز و یالنیز میللتین ایرادهسیدیر.
حقوقون ضعیفله دیگی، محکمهلره اولان گووهنین سارسیلدیغی، مجلیسین تأثیر گوجونون آزالدیغی، فرقلی دوشونجهلرین باسقی ایله قارشیلاشدیغی بیر اورتامدا هئچ بیر میللتین گله جگی آیدین گؤرونمز. تورک میللتینین گوجو شخصلرده دئیل، قانونون اوستونلویونده، آزاد دوشونجهده و میللی ایرادهدهدیر.
مصطفی کمال آتاتورکون بیزلره میراث قویدوغو ان بؤیوک دگر میللتین اؤز طالعینه صاحب چیخماسیدیر. جومهوریتین قورونماسی یالنیز دؤولت سرحدلرینین قورونماسی دئیل، عینی زاماندا اونون قوروجو ایلکهلرینین یاشادیلماسی دئمکدیر.
بیز اینانیریق کی، تورکیهنین گله جگی داها چوخ حقوق، داها چوخ آزادلیق، داها گوجلو میللی ایراده و داها گوجلو دؤولت قوروملاری اوزرینده یوکسهلهجکدیر.
عینی زاماندا تورکیهده یورودولن “تئررورسوز تورکیه” هدفینین اوغور قازانماسینی تورک میللتینین بیرلیگی و دؤولتین گوجلهنمهسی باخیمیندان اؤنملی ساییریق. تئررورون و سلاحلی زوراکیلیغین سیاست اوزرینده کؤلگه یاراتمادیغی بیر تورکیه بؤلگهنین باریش و ثابیت لیگینه داها بؤیوک تؤهفهلر وئرهجکدیر.
بیز اینانیریق کی، “تئررورسوز تورکیه” آنلاییشینین طبیعی داوامی گلهجکده “تئررورسوز گونئی آزربایجان” دوشونجهسینین ده گئرچکلشمهسینه یول آچاجاقدیر. تورک میللتینین یاشادیغی هر جوغرافیادا سلاحین دئیل، خالق ایرادهسینین؛ قورخونون دئیل، آزادلیغین؛ باسقینین دئیل، حقوقون حاکم اولماسی ان دوغال ایسته گیمیزدیر.
گونئی آزربایجان قورتولوش پارتیاسی اولاراق تورکیه جومهوریتینین قوروجو دگرلرینه، آتاتورک ایلکهلرینه، میللی ایرادهیه، حقوقون اوستونلویونه و تورک دونیاسینین اورتاق گله جگینه باغلیلیغیمیزی بیر داها بیان ائدیریک.
یاشاسین تورکیه جومهوریتی!
یاشاسین میللی ایراده!
یاشاسین حقوقون اوستونلویو!
یاشاسین تورک میللتینین بیرلیگی و باغیمسیزلیغی!
گونئی آزربایجان قورتولوش پارتیاسی (گاقپ)
۳ ایون ۲۰۲۶
