پرئزیدئنت اردوغان: شهیدلریمیزه گؤره کدریمیز بؤیوک اولسا دا، تورک عصرینده ایدهآلیمیزی محو ائتمهیه چالیشان آلچاقلارا قارشی موباریزه عزمیمیز داها بؤیوکدور
پرئزیدئنت رجب طیب اردوغان دئییب کی، میللتین باریش و تهلوکهسیزلیگینی هدف آلان هر جور سالدیری اوغورسوزلوغا دوچار اولاجاق.
پرئزیدئنت اردوغان، ایستانبول سرگی مرکزینده گئچیریلن ساها ائکسپو ۲۰۲۴ مودافیعه، هاواچیلیق و اوزای صنایع سرگیسی پروقرامیندا چیخیش ائدیب.
اکتبرون ۲۳-ده باشکند آنکارادا تورک هاواچیلیق و اوزای صنایع آنونیم شیرکتینین (توصاش) شهرجییینده تؤردیلن تئرور سالدیریسینا توخونان اردوغان، “شهیدلریمیزه گؤره کدریمیز بؤیوک اولسا دا، تورک عصرینده ایدهآلیمیزی محو ائتمهیه چالیشان آلچاقلارا قارشی موباریزه عزمیمیز داها بؤیوکدور. بیزی بو جور آلچاق حرکتلرله گئری چکهبیلهجکلرینی دوشوننلری تعقیب ائتمهیه و خور ائتمهیه داوام ائدجهییک. میللتیمیزین امین-آمانلیغینی و تهلوکهسیزلیگینی هدف آلان هر جور سالدیری اوغورسوزلوغا دوچار اولاجاق و نتیجهده گئرییه دؤنوب قانلا قیدالانان تئرور بارونلارینا ضربه ائندیرهجک” دئدی.
اردوغان بیلدیریب کی، حربی هاوا قووهلری و میللی استیخبارات تشکیلاتی بو آلچاق هوجوما سوریه و عراقداکی تئرور هدفلرینی محو ائتمکله جاواب وئریب.
اردوغان، “بیز بو خَیانتلرین آرخاسیندا هانسی نیتین دایاندیغینی چوخ آچیق شکیلده گؤرهبیلیریک. بیز موزدلو قاتیل سورولرینین هدفلرینیدن خبرداریق. تورکیه جمهوریتی تکجه بوتون تئرور تشکیلاتلاریندان دئییل، هم ده بو قتل شبکهلرینی اوستوموزه سالان امپئریالیست قولدور دستهلریندن داها بؤیوک و گوجلودور” دئدی.
