بایکوت دئیل، ایران آدلانان دؤولت سیستمی ردّ اولمالی!
گونئی آزربایجان میللی قورتولوش حرکاتینین فارسچی-شعوبی رئژیمین سئچکی اویونو ایله باغلی بیلدیریشی
سئویملی میللتیمیز!
فارسچی-شعوبی رئژیمین جینایتکار رهبرینین اعترافینا گؤره؛
“ایچدهن رئژیمه موخالیف اولان کیمسهلر، هرگاه گلیب (ایسلام) نظامی آلتینداکی سئچکیلرده سس وئریرسه، دئمک نظاما باغلی اولدوغونو گؤستریر.”
خامنه ای نین بو سؤزلری، رئژیمین قارشیدان گلن مجلیس و خبرهلر سئچکیسینین آچیق-آیدین تابلوسونون گؤسترگه سیدیر.
فاشیست رئژیم، بیر داها میللتلری آلداتماق اوچون بوش-بوش وعدلر وئرمکدهدیر. ایران آدلانان جوغرافیادا یاشایان میللتلرین ان آزیندان ۸۵%-نین سسینی ایتیرهن منفور رئژیم اوچون هر سئچکی یئنی بیر آلداتما میدانی حکمو داشییر.
ایشسیزلیگه، اوجو گؤرونمز اینفلاسیایا، یوخسوللوغا، درین آجلیغا، تپهدن-دیرناغا اوغرولوق و فساد ایچینده بوغولماغا، میللی و انسانی حاقلارینین یوخ ائدیلمهسینه محکوم اولان، اورمو گؤلونون قورودولماسیندان اؤتورو اؤلوم-یاشام موجادیلهسینه چکیلهن، چئوره، دوغال و یئر آلتی-یئر اوستو ثروتلرینین تالانماسینا سئیریجی قالان، ۷۵%-ین اوزرینده اولان غیری-فارس ائتنیکلرین ایلکین حاقلارینین محکومیتیله اوغراشان، یاوان چؤره گینین تئررور قروپلارینا اؤتورولمهسینه نیسگیل گؤزو ایله شاهیدلیک ائدن، وحشی بیر رئژیمین اؤلکهنی، بؤلگهنی و دونیانی اودا چکمه آرزوسونا حسرتله نظارت ائدن بیر توپلومدان نئجه سس گؤزلهمک اولار؟ ایران آدلانان دؤولته محکوم اولان خالقلار بونا جاواب وئرمه لیدیرلر.
گونئی آزربایجانا گلینجه، قاجار تورک دؤولتینین اینگیلتره الیله دئوریلمهسی و فارس فاشیزمینین بؤلگهده حاکم اولماسی ایله میللتیمیزین و یوردوموزون ۱۰۰ ایللیک اسارت سورجی باشلامیشدیر. او آجی اولایدان بری میللت و دؤلت اولاراق اسارت آلتینداییق. بونا گؤره، آزربایجان تورک میللتی و باشقا خالقلارین میللی قورتولوش یولو یالنیز ایستیقلالدان کئچیر. ایستیقلال موجادیلهسی باشلی-باشینا اؤزگور روح و اؤزل دوشونجهسیله آنلام قازانیر. بو اوزدن ایران آدلانان قوندارما سیاسی وارلیغین ۱۰۰ ایللیک سؤمورگهن وارلیغینا سون قویماق اوچون فاشیست سیستئمین بوتونلویو آرادان گؤتورولمهلی و هر میللتین میللی دؤولتچیلیگی قورولمالیدیر.
گامقح حساب ائدیر کی، ایران آدلانان دؤولت سیستئمی آلتیندا کئچیریلهن هرهانسی سئچکینین آزربایجان تورک میللتیله باغلانتیسی یوخدور.
بو اوزدن آزربایجان تورک میللتی و آزربایجان میللی حرکاتی بو سئچکیلرین بایکوتی ایله دئیل، ایشغالچی رئژیمین وارلیغینین بوتونلویونو ردّ ائتمکله یولونا داوام وئرمه لیدیر.
گونئی آزربایجان میللی قورتولوش حرکاتی-یؤنتیم قورولو
۲۰۲۴/۰۲/۲۵
