💥آددیم-آددیم اورتا دوغو ساواشینا دوغرو!
ایران ووردو. ایسرایل قازاندی، غزه ایشی بیتدی!
گونئی آزربایجان بو ساواشین هاراسیندا
{۲ اینجی بؤلوم }
🔸ایسرایل ایله ساواشا ،فارسچی رئژیمی نهلر گؤزلر.
۱- سون پارلامئنت سئچکیلرینده کوتلوی بایکوتلا قارشی-قارشییا قالان رئژیم اوچون عموم میللی نیفرت زمینی گوندن-گونه بؤیومکدهدیر. میللی، مالی، اخلاقی، سیاسی، اقتصادی، اجتماعی و توپلومسال پیسلیکده ال-آیاق چالان رئژیم اوچون ییخیم زامانی یئتیشمیشدیر. تئوکراتیک و ایرقچی رئژیمه قارشی بیر ساواشین آنلامی اؤلوم دئمکدیر.
۲- رئژیم، دوشونور کی، ایسرایل ایله ساواش ،ایچ وحدتینین یارانماسی اوچون بیر فورصت اولابیلر. رئژیم چوخ یالنیش دوشونور. ایران-عراق ساواشیندا خمینی، ایران آدلانان اؤلکهنین %۹۰-نی آلداداراق، اؤز یانینا چکه بیلدی. خامنه اینین نه خمینی قدر کاریزماسی وار و نه ده خالقلار ۴۳ ایل بوندان اؤنجکی خالقلاردیر. بوگون، خامنه اییه قارشی نیفرت آلانی %۹۰-لاردادیر. کسینلیکله بو ساواش اوز وئررسه خامنه ای بو ساواشین ان بؤیوک اودوزانی اولاجاقدیر.
۳- ساواش باش توتارسا آزربایجان تورک میللتی باشدا اولماقلا، غیری فارس میللتلرین ایستیقلالچی حرکاتی خالقلارین دستهیینی قازاناراق، ۱۹۲۵-جی ایلده بیناسی قویولان فارسچی ایران دؤولتینینده دؤنمی باشا چاتاجاقدیر. بونو ساواشدان مغلوب چیخاجاق پانفارسیزمین اؤنلهمه گوجو چاتمایاجاقدیر.
۴- ساواشین باش توتماسی ایله فارسچی-ایرانچی ایسلام جومهوریتی سرعتله داغیلماغا محکوم اولاجاقدیر. سؤمورگن دؤولتلرین حمایه سی آلتیندا اولان[ خالقین موجاهیدلری تشکیلات ]و یا شاهچی، سلطنتچی، جومهوریتچی و هر هانسی ایرانچی-فارسچی ائتلافین ایران دؤولتچیلیینی آیاقدا ساخلاماق گوجو اولمایاجاقدیر.
۵- ساواش باش توتارسا، باشدا آزربایجان میللی حرکاتی اولاراق، بوتون اسارت آلتیندا قالان میللی حرکاتلارین اؤزگور و باخیمسیز میللی تشکیلاتلانماسی سرعتلنهجک.
۶- همین میللی حرکتلرین اؤنه چیخماسییلا اولوسلارآراسی ایران کونسئپتواللیغین یئرینی اورتادوغودا میللی قورتولوشچو دؤولتسیز خالقلار آلاجاقدیر.
۷- ساواش باشلارسا ایران آدلانان دؤولت سیستئمینین آلتیاپیسینین فونکسییاسینی بیتینجه سورهجکدیر. بو سورجی آرا-سیرا آتشکسلر ائتکیلهمهییهجکدیر.
۸- ساواش باشلارسا، ایستر-ایستمز ایسرایل- آزربایجان ایلیشکیلری یئنی بویودلارا گیرهجک. بو کیمسهنین شخصی آلانی کیمی دئییل، بیر دؤولتچیلیک گرهیی کیمی دوشونولمهلیدیر.
۹- آزربایجان-تورکییه-پاکیستان دؤولتلرینین اوچلو ایستراتئگییاسیندا گونئی آزربایجان فاکتی بؤلگهنین ان اؤنملی گوندهمی کیمی دقت مرکزینده اولاجاقدیر. بو ایسه ساواشین طالعی اوچون دانیلماز فاکتا چئوریلهجکدیر.
۱۰- ساواش هاوا ساواشی اولونجا ایرانین قارا عسکری گوجو ساواشین دیشیندا قالاجاقدیر. سپاه و اوردونون فونکسییاسینین اولمادیغی یئرده رئژیمین باسقیچی گوجو خالقلارین باسیلماسینا یؤنلهجکدیر. اؤلکه ایچی ساواش قاچیریلماز اولاجاق. اؤلکهده ایکی کسکین و دوشمن بؤلوکو یاراناجاق:
آ. دؤولت گؤزونده دوشمن کوتله
ب .کوتله گؤزونده خایین دؤولت!
۱۱- خالقلاری بیر-بیرینه قیردیران رئژیم اوچون باتی آزربایجاندا داها تهلوکلی /اورمو، خوی، سالماس، سولدوز، ماکی و…/ بیر فورصت میدانی آچیلاجاق. هر زامان تهرانین امریله نفس آلیب-وئرن کورد عشیرتلری پ ک ک، پژاک، ک د پ و…. تئررور قروپلاری ایله تورکون تورپاقلاری اوستونه یورویهجکلر. تهران، آزربایجان تورکلرینین میللی بیرلیینی قیرماق یولوندا کورد تئررور کارتیندان داها گئنیش ایستیفاده ائتمیه قالخاجاقدیر.
۱۲- رئژیمین و بؤلگه تئروریزمینین دیلهدیینین ترسینه اورمو مرکزلی باتی آزربایجاندا اولان گئدیشات اوزوندن آزربایجان تورک میللتی و اونون میللی -سیاسی قوروملاری توپ یئکون بیرلییه ساری یورویهرک، گلمه نانکورلاری تورک تورپاقلاریندان اوزاقلاشدیراجاق.
۱۳- سپاهین و باشقا اوردو قوهلری ایچینده چوخ بؤیوک کسیم رئژیمین گیزلی دوشمنیدیر. ساواش باشلارسا بو گیزلی دوشمنلیک آشکارا چیخاراق،میللتین صافینا قوشولاجاقلار. اؤزللیکله اوردو و سپاه سیرالاریندا اولان چوخلو تورک اؤولادی واردیر. هر آزربایجان تورکو کیمی اونلاردا اؤز دوغما تورپاقلاری اوغروندا اؤلمه یه حاضیردیرلار. باتی آزربایجان بو یوردداشلارین ان آچیق میدانی اولاجاقدیر.
۱۴- بؤیوک پاسدار و بسیجی کوتلهسی اؤز میللتینین الیایله اؤلمک ایستمز. ایشسیزلیک و چارهسیزلیک اوزوندن رئژیمین فدایسی دورومونا دوشن ساییسیز رئژیمه قارشی نیفرت قوسان بو خالق ائولادلاری کسینلیکله میللت یولونا دؤنهجکلر.
۱۵- ساواش باشلارسا، دیلینی، کولتورونو، میللی وارلیغینی، تورپاغینی، یئرآلتی-یئراوستو سروتینی فارسچی رئژیمین ایشغالیندا گؤرهن تورک، تورکمن، عرب، بلوچ، کورد و… پاسدار، اوردوچو خالقلارینین میللی قورتولوش ساواشینا قاتیلاجاق، گرهکیرسه میللی آزادلیق عسکرلری اولاجاقلار.
۱۶- ۴۴ ایل بویونجا میللتلرین وارینی تالاییب باشقا اؤلکهلره قاچان جانیلرین اؤولادلاری، عائله لری، وکیللری اینترپل آختاریشینا وئریلهجک، ایچریده کی جانیلرین خایین یاشامی ایسه کوتلوی قیساس آلانینا گیرهجکدیر.
۱۷- رئژیمین تکجه گلیر قایناغی اولان پئترول و گاز مرکزلری اتفاق طرفین مدرن اوچاق و آراجلاری ایله یئرله-بیر اولاجاقدیر. رئژیمین، اولان-بیتن ائکونومی ییللاری دارما-داغین اولاجاقدیر. اؤلکهنین چؤکموش ائکونومیسی بوتونلوکله صیفیرلاناجاقدیر.
۱۸- سانکسییالار آلتیندا ازیلیب-داغیلان یاشام سیستئمی بوتونلوکله دایاناجاق، بوتون آلانلاردا حیات ایفلیج دوروما دوشهجک.
۱۹- رئژیم ایچینده گیزلی دوشمنلیکلرین اؤنه چیخماسی ایله حاکمیت ایچی قانلی حساب لاشمالار باشلایاجاقدیر.
۲۰- ۴۴ ایللیک یئرلشن موسساد و آمان کیمی ایسرایلین جاسوسلوق شبکهلری بیرباشا دؤورهیه گیرهجکدیر.
۲۱- همین جاسوسلارین ایلک هدفینده سانترال تاسیسلری یئر آلاجاقدیر. تاسیسلرین پوزولماسی ایله میلیونلار اینسان کیمیهوی اؤلوم چمبرینه محکوم اولاجاقدیر.
۲۲- رئژیمین آمریکادا، آوروپادا فورصت گودن دوشمهنلری آکتیولشهرک اؤلکه ایچی اؤرگودلهنمه ایشلرینه سرعت وئرهجک، حتی خالقلارا قارشی رئژیمله دانیشیق ماساسی اولوشدورماغا چالیشاجاقلار.
۲۳- چؤکوشه محکوم اولان رئژیم اوچون آمریکا و آوروپا بیرلیینه باغلی اولان مخالیف قوهلر ایله ایشبیرلیگی سون چاره و آرزو اولاجاقدیر.
۲۴- ساواش باشلارسا، ایلک آقازاده لر، آردیجا آقالارین قاچیشی باشلایاجاق. ایللر بویونجا اؤلکهنین پارالارینی آوروپا، آمریکا ،کانادا ،سوئیس بانکلاریندا یاتیردانلار اوچون قاچاق یوللاری قولایجا ساغلاناجاقدیر.
۲۵- سیویل کوتلهنین قاچیش ایشی چوخ چتین و فلاکتلی اولاجاق. تورکیه، آزربایجان، پاکیستان، افغانیستان، عراق، خزر و کؤرفز سینیرلاری میلیونلار اؤلکه داشین اومود و توپلاشما یئری اولاجاقدیر. میلیونلار اینسان آنا یوردونو ترک ائدهرک سفیل- آوارا یولچوسو اولاجاقدیر.
۲۶- ساواش اولارسا، میلیونلار اینسانین بوتون نجیب آمال-آرزوسو قاندان بسلهنن وامپیرلرین پایی اولار.
آردی وار…
