Rafael Qrossi: İran və beynəlxalq agentlik hər hansı nəticə əldə etməsə, nüvə anlaşmasının bərpası çətin olacaq
Atom Enerjisi üzrə Beynəlxalq Agentliyin (MAQATE) sədri Rafael Qrossi Tehrana səfəri zamanı bildirib ki, bu ölkə beynəlxalq agentliklə təhlükəsizlik təminatı məsələlərində razılığa gəlməsə, nüvə anlaşması çətin olacaq.
Bu barədə Rafael Qrossi martın 5-də Tehrana səfəri çərçivəsində İranın Atom Enerjisi Təşkilatının sədri Məhəmməd İslami ilə birgə mətbuat konfransında məlumat verib.
“Bu müddət ərzində mənim cənab İslami ilə davamlı görüşlərim olub. Bir neçə konkret məsələ var ki, uzun müddətdir həllini tapmayıb və bunları aydınlaşdırmağa ehtiyac var. Əvvəllər bu barədə uğur qazana bilməmişik, ona görə də bu məsələyə praqmatik yanaşmağa çalışdıq”, – Qrossi vurğulayıb.
Məhəmməd İslami isə bu barədə qeyd edib: “Biz belə bir nəticəyə gəldik ki, İranla beynəlxalq agentlik arasında mübadilə edilməli olan sənədlər ən geci iyun ayına qədər həyata keçirilməlidir”.
