TÜRKİYƏ CÜMHURİYYƏTİNDƏKİ SON SİYASİ GƏLİŞMƏLƏRLƏ BAĞLI GÜNEY AZƏRBAYCAN QURTULUŞ PARTİYASININ (GAQP) BİLDİRİSİ
Türkiyə Cümhuriyyəti Türk millətinin İstiqlal Savaşı içindən doğmuş, Mustafa Kamal Atatürkün öndərliyində milli iradə, xalq hakimiyyəti, hüquq dövləti və çağdaş dövlətçilik ilkələri üzərində qurulmuşdur. Bu Cümhuriyyət yalnız Türkiyə türklərinin deyil, bütün Türk Dünyasının qürur qaynağı və ortaq qazancıdır.
Bu gün Türkiyədə yaşanan siyasi və toplumsal gərginliklər, hüququn üstünlüyü ilə bağlı artan qayğılar, xalq iradəsinin və dövlət qurumlarının gələcəyi ətrafında yaranan suallar biz Güney Azərbaycan türklərini də düşündürməkdədir.
Dövlət heç bir partiyanın, heç bir çevrənin və heç bir şəxsin mülkü deyildir. Dövlət millətin ortaq varlığıdır. Hakimiyyətin qaynağı isə yalnız və yalnız millətin iradəsidir.
Hüququn zəiflədiyi, məhkəmələrə olan güvənin sarsıldığı, Məclisin təsir gücünün azaldığı, fərqli düşüncələrin basqı ilə qarşılaşdığı bir ortamda heç bir millətin gələcəyi aydın görünməz. Türk millətinin gücü şəxslərdə deyil, qanunun üstünlüyündə, azad düşüncədə və milli iradədədir.
Mustafa Kamal Atatürkün bizlərə miras qoyduğu ən böyük dəyər millətin öz taleyinə sahib çıxmasıdır. Cümhuriyyətin qorunması yalnız dövlət sərhədlərinin qorunması deyil, eyni zamanda onun qurucu ilkələrinin yaşadılması deməkdir.
Biz inanırıq ki, Türkiyənin gələcəyi daha çox hüquq, daha çox azadlıq, daha güclü milli iradə və daha güclü dövlət qurumları üzərində yüksələcəkdir.
Eyni zamanda Türkiyədə yürüdülən “Terrorsuz Türkiyə” hədəfinin uğur qazanmasını Türk millətinin birliyi və dövlətin güclənməsi baxımından önəmli sayırıq. Terrorun və silahlı zorakılığın siyasət üzərində kölgə yaratmadığı bir Türkiyə bölgənin sülh və sabitliyinə daha böyük töhfələr verəcəkdir.
Biz inanırıq ki, “Terrorsuz Türkiyə” anlayışının təbii davamı gələcəkdə “Terrorsuz Güney Azərbaycan” düşüncəsinin də gerçəkləşməsinə yol açacaqdır. Türk millətinin yaşadığı hər coğrafiyada silahın deyil, xalq iradəsinin; qorxunun deyil, azadlığın; basqının deyil, hüququn hakim olması ən doğal istəyimizdir.
Güney Azərbaycan Qurtuluş Partiyası olaraq Türkiyə Cümhuriyyətinin qurucu dəyərlərinə, Atatürk ilkələrinə, milli iradəyə, hüququn üstünlüyünə və Türk Dünyasının ortaq gələcəyinə bağlılığımızı bir daha bəyan edirik.
Yaşasın Türkiyə Cümhuriyyəti!
Yaşasın Milli İradə!
Yaşasın Hüququn Üstünlüyü!
Yaşasın Türk Millətinin Birliyi və Bağımsızlığı!
Güney Azərbaycan Qurtuluş Partiyası (GAQP)
3 İyun 2026
