Bir Ananın Ağısı, Bir Millətin Etirafı. Gəncliyə Çağırış Manifesti
Bu yazını sakit yazmaq mümkün deyil.
Bu, emosional bir çıxış deyil — bu, vicdanın hayqırtısıdır.
Tehranda gənc bir ailənin oğlu “irançılıq” və “pəhləviçilik” adı altında molla–fars rejiminin cinayətkar mexanizmi tərəfindən öldürüldü. Lakin bu faciəni sadəcə növbəti repressiya xəbəri kimi təqdim etmək mümkün deyil. Çünki ana övladının cansız bədəni üzərində fars dilində ağı deyə bilmədi. Ana içindən gəldiyi kimi, Türk dilində balasını oxşadı, ona ağı dedi.
Bu səhnə təkcə bir ailənin faciəsi deyil.
Bu səhnə susdurulmuş bir millətin kimliyinin çılpaq etirafıdır.
Burada acı bir həqiqət var — və bu, həm də bizim etirafımızdır.
Bu, siyasətlə məşğul olanların, milli iddia daşıyanların uğursuzluğudur.
Biz millətimizin gəncliyini qoruyacaq, ona doğru yol göstərəcək, kimliyini, hüququnu və gələcəyini təmin edəcək aydın siyasi proqram ortaya qoya bilməmişik. Gözümüz görə-görə gəncliyimizi özgə ideologiyaların ixtiyarına buraxmışıq. Onlar isə bu gəncləri öz siyasi məqsədləri üçün formalaşdırıb, öz cəbhələrində sərf edib, sonda da qurban veriblər.
Gənclər bu rejimin problemi deyil — bu rejimin hədəfidir.
Onları kimliyindən ayırmaq, tarixindən qoparmaq, dilini unutdurmaq və “İran” adı altında fars hegemonluğunun canlı alətinə çevirmək istəyirlər.
Həmin görüntünü izləyən hər kəs anlayır ki, bu sadəcə bir ölüm deyil.
Bu, oğurlanmış gələcəkdir.
Bu yazı bir çağırışdır.
Ey Azərbaycan gənci, ey bu coğrafiyanın vicdanlı gənci!
Unutma: sən başqasının ideoloji layihəsi üçün doğulmamısan.
Sən nə molla rejiminin, nə şah nostalgiyasının, nə də fars faşizminin yanacağı deyilsən.
Əgər sənə “birlik” deyib kimliyini inkar edirlərsə, bil ki, bu birlik deyil — istismardır.
Əgər sənə “vətən” deyib dilini yasaqlayır, tarixini saxtalaşdırır və sonda səni güllə qarşısına qoyurlarsa, bu vətən deyil — zindandır.
Bu gün susmaq tərəfsizlik deyil — təslimçilikdir.
Bu gün siyasi proqram tələb etmək radikallıq deyil — yaşamaq haqqıdır.
Bizə emosional şüarlar yox,
bizə romantik fars nağılları yox,
bizə milli iradəyə söykənən, hüquqa əsaslanan, gəncliyi qoruyan siyasi yol xəritəsi lazımdır.
Bu çağırış həm gəncliyədir, həm də özümüzə:
ya məsuliyyət alacağıq,
ya da hər yeni ana ağısı bizim boynumuza yazılacaq.
Bir ananın Türk dilində dediyi ağı —
bir millətin son xəbərdarlığıdır.
Artıq oyanmaq zamanıdır.
Artıq təşkilatlanmaq zamanıdır.
Artıq öz taleyimizi özgələrin ixtiyarına buraxmamaq zamanıdır.
⸻
Azərbaycan Strateji Araşdırmalar Mərkəzinin (AzSAM) Kanada bölümü
Siyasi şərhçi — Aslan İsabəyli
