💥آددیم-آددیم اورتا دوغو ساواشینا دوغرو!
ایران ووردو. ایسرایل قازاندی، غزه ایشی بیتدی!
گونئی آزربایجان بو ساواشین هاراسیندا؟
۱- آمئریکانین ایزنیله ۲۰۲۴/۰۴/۰۱ تاریخینده، ایسرایلین اف۳۵ اوچاقلاری ایرانین دمشق کونسوللوغونو ووردو. تهران موللا رئژیمینین ایکی گئنئرالی، ۱۴ اوست دوزئی حربیچیسی و دیپلوماتی اؤلدو. ایسرائیل ایرانا گل-گل چاغیریشینی بیر داها دیله گتیره‌رک، تهرانی گئنه آشاغیلادی.
۲- ایران شعوبی-فارسچی رئژیم ۴۴ ایل تحقیردن سونرا ۲۰۲۴/۰۴/۱۳ گئجه یه دوغرو آمریکانین و ایسرایلین بیلگیسی آلتیندا ۲۰۰ میلیون دلارا مال اولان ۳۳۰ فوزه، راکئت و سیها ایسرایله فیرلاتدی. تکجه بیر نئچه بالئستیک فوزه دیشیندا بوتون فیرلاتیلان بومبالار محو ائدیلدی.
۱۲ گونون ایچینده آردی-آردینا ایکی سئناریو دونیا مئدیاسینا دوشه‌رک، ایکی آشیری تئوکراتیک رئژیمین میسییاسی یئنی آشامایا آیاق قویدو.
تئررو چمبرینده اینله‌ین اورتادوغو بؤلگه‌سی تئزلیکله بؤیوک حئسابلاشما آلانی اولاجاق سیقناللارینی وئرمه‌یه باشلامیشدیر. ایکی ساواش دلیسی، بیر-بیرینه گرکن دوشمن، اورتادوغو پرویئکتینین ایکی آکتیورو بوندان سونرا نائب‌لر آراجیلیغی ایله دئییل اوز-اوزه ساواشا گیرمک دوزه‌نی اورتایا قویموشدور. سؤزسوز کی، ۴۴ ایل بویونجا ایسرایلین قارشیسینا چیخماقدان قاچان موللالار رئژیمی اوچون بو بؤیوک بیر ریسک میدانیدیر. تهران شعوبی-فارسچی رئژیم، بو اویونون سونوندا ییخیلاجاغینی هرکسدن داها درین بیلیر. ایسرایلین ایرانی میسیلله‌میه مجبور ائتمه‌سیله الده ائتدیی بؤیوک قازانجین سیاسی، حربی و دونیا اوزره پسیکولوگییا اوستونلویو گؤز اؤنونده‌دیر. ایران اؤز حمله‌سیله قویوسونو قازدی. ایسرایلین الده ائتدیی ایلک قازانجی سون غلبه‌سینین ییللارینی آچمیش اولدو.
ایسرایل ایران یوروشوندن نه قازانج الده ائتدی:
آ) ایسرایل ساواشا دعوتییه گؤنده‌رن تهرانی حقوق‌سال محکوم‌لوغا ایتله دی. اؤزونو مظلوم، ایرانی ظالم گؤسترمیش اولدو.
ب) ایسرایل کوتله‌سی طرفیندن سیخیشدیریلان نئتانیاهو حاکمیتینین چؤکوشو ایران تجاووزو اوزوندن ائرته لندی. بلکه، بو تهران گئری قافالیلارین نئتانیاهویا وئردیی ان بؤیوک بایرام هدییه‌سی اولدو.
ج) غزه ایشغالی اؤز چؤزومونو تاپدی.
ایسرایل-حماس ساواشی کوره‌سل گوندمدن دوشدو. غزه ده ایشغال سورجینین بوندان سونرا سسسیزجه سونا چاتماسی گؤزلنیلیر. غزه خالقینی ایسرایلین توپلارینین اؤنونه سره‌ن تهران رئژیمی بو دفعه حماسین قتلینی ایمضالادی.
د) ایرانین حماس آراجیلیغی ایله ایسرایله تجاووز ائتمه‌سینین آردیندان ایسرایلین غزه خالقینا یاشاتدیغی سویقیریم آکتی آوروپا و بیر چوخ دؤولتین غضبینه اوغراسا دا، ایرانین بیر باشا ایسرایله فوزه‌لر فیرلاتماسی ایله پوکئرین آسی یئنه ایسرایلین طرفینه وئریلدی.
ائ) فوزه‌لر گؤیده ایکن دونیانین ان بؤیوک ۷ ائکونومیسی ایسرایلین ایران قارشیسیندا یالنیز قالمایاجاغینی بیان ائتدیلر. تل‌آویو بیر گئجه‌نین ایچینده یهودیتین دئییل، کریستیانلیغین قودسال سولئیمانینا چئوریلدی. بوتون دونیا بانکلارینین کرئدیتلری ایسرایله آچیق اعلان اولوندو.
ف) آمریکا، اینگیلتره، عربیستان، اوردانییا کیمی اؤلکه‌لر ایران فوزه، سیها و راکئتلرینی ایسرایله یئتیشمه‌دن گؤیده پارتلاتدیلار. ایسرایلین دمیر قوببه‌سینه آز سایدا پای یئتیشدی.
گ) هارداسا عرب اؤلکه‌لرینین بوتونو ایسرایلین یانیندا دایان‌دیلار. غزه ده باش وئرن اینسان، چئوره و عرب فلاکتی اوزونده ایسرایله بیراز قیرغین اولان عرب اؤلکه‌لری ایرانا ایناد ایسرایله دستک مساژی آتماق اوچون یاریشا گیردیلر.
ه) آمئریکا ایرانی یالنیزجا حده‌له‌مه‌دی. تهرانا قارشی ساواش اورتاغی اولدو. ساواش اولارسا ایران اوچون چوخ آغیر اولاجاغینی رسمی دیله گتیردی.
i) روسییا ایرانی آپ-آچیق تک بوراخدی. بؤلگه‌ده تانسیونون یوکسلمه‌سینی ایسته‌میرم دئدی! سانکی، اوکراینادا یاشاتدیقلاری تانسیون دئییلدیر کیمی بیر آندا باریشدان یانا اولان کرئملین اولدوقجا جایدیریجی اوینادی.
ژ) ۴۴ ایلدیر هر تورلو آمئریکا، روسییا و اینگیلتره دؤولتلرینین سیرغالی عاملی کیمی بؤلگه‌نی باریت آنباری ائد‌ن تئهران رئژیمی اوچون اربابلار طرفیندن گؤزدن چیخاریلماسی بؤیوک گؤزلنیلمزلیک اولدو.
ک) ایرانین دوشوندویو باشقا بؤیوک موتتفیقی چین دؤولتی سسسیزلیینی سوردورورکن، یئنی ائکونومیک بازارلارین آچیلماسینا اوستونلوک وئردیینی تهرانا آنلاتدی. چین اوچون دونیا سوپئری اولماق وارکن عؤمرو توکنمیش انرژینین نه آنلامی اولا بیلرکی! گؤرونور کی، چین دؤولتی ده پایینا دوشنی ایران-ایسرایل قارشی دورماسیندان آلمیش، مومکون قدر تئهران گئریقافالاریندان اوزاق دوشم‌یی سئچه‌جک‌دیر.
ل) ایسرایل فرصت‌دن یارارلاناراق لیواندا یئرلشن ایران یانلی حیزبوللاهین سلاح-سورسات دئپولارینا بومبا یاغدیردی. بو دا اورتاق عملیات اولاراق دؤرد اؤلکه‌نین آدی ایله تاریخ صحیفه‌لرینه دوشدو. بونون آنلامی ایسه، ایرانین ایسرایله سالدیریسیندا قارشیسیندا دؤرد موتتفیق اؤلکه‌نی گؤرموش اولدو.
م) دونیا مئدیاسیندا اوردانییا گؤیلرینه تجاووز ائد‌ن ایرانین حرکاتی پیسلنیرکن اوردانییا هاوا ساوونماسی دا دارتیشیلدی. بو ایسه، بونو گؤستریر کی، ایرانین بوندان سونراکی ایسرایله سالدیریسیندا اوردانییانین هاوا حاکمیتی ایران طرفیندن تجاووز اولوناجاقدیر. بو ایسه باشلی-باشینا اوچونجو اؤلکه‌یه ساواش اعلانی دئمکدیر.
ن) ایران بوتون های-کویو ایله ایسرایل اوزه‌رینه یورویورکن، ایسرایل اؤز طرفداشلارینین مدرن ساوونما سیستئمیله دقیقه‌لر ایچینده اونون های-کویونو پوسکورتدو. ایسرایل ایرانی دوزاغینا چکرکن عین حالدا دوشمنینین ساواش گوجونون کاپاسیته‌سینین آشاغی اولدوغونو اوزه چیخاردی.
او) ایسرایلین ۱۰ ایللردی اتم سیلاحلی ایران تهلوکه‌سینین جیددیتینی دونیا توپلومونا ایناندیرماغا چالیشیر. اتم بومبالی ایرانین دونیا اوزرینده یاراتدیغی تهلوکه ایسرایلی حاقلی چیخاردی.
آردی وار
