Güney Azərbaycan Təşkilatları Əməkdaşlıq Şurasının Urmu Gölünün Qurudulması Faciəsi İlə Bağlı Bəyanatı
Urmu Gölünün qurudulması, Orta Doğunun ən böyük ekoloji fəlakətlərindən biri və İran İsalm Respublikası rejiminin Azərbaycan Türk Millətinə qarşı sömürgəçi davranışının açıq bir nümunəsidir. Bu faciənin nəticələri təkcə bir göl və ya bir bölgə ilə məhdudlaşmır, əksinə milyonlarla insanın Azərbaycan və hətta ətraf bölgələrdə sosial, iqtisadi və insani həyatını təhdid edir. Mütəxəssislər xəbərdarlıq ediblər ki, bu proses davam edərsə, yaxın gələcəkdə, o qədər də uzaq olmayan bir zamanda, böyük şəhərlərdə – o cümlədən Təbrizdə yaşayış mümkünsüz olacaq.
Bu faciə onilliklər boyu məqsədli şəkildə aparılan anti-Azərbaycan siyasətlərinin nəticəsidir. 1990-ci illərin ortalarından etibarən mütəxəssislər dəfələrlə gölün aqibəti barədə xəbərdarlıq etmişdilər. Güney Azərbaycanda vətəndaş etirazları 2000-ci illərin əvvəllərindən başladı və müxtəlif mərhələlərdə geniş və ümumi şəkildə davam etdi. Bununla belə, həmin dövrlərin hökumətləri gölü xilas etmək üçün heç bir ciddi tədbir görmədilər. 2013-cü ildə “Urmu Gölünü Xilas Etmə Qərargahı”nın yaradılması və 27 müxtəlif layihənin hazırlanması da bu aqibətin qarşısını ala bilmədi. Bu layihələrə ayrılan az miqdarda büdcə böhranın miqyası ilə heç bir uyğunluq daşımırdı və İranın mərkəzindəki səhralıq bölgələrə milyardlarla dollarlıq su transferi layihələri ilə müqayisədə olduqca kiçik idi. Son illərdə isə hətta bu yarımçıq öhdəliklər də kənara atıldı və xilas etmə qərargahı ləğv edildi.
Dəlillər və faktlar göstərir ki, Urmu Gölünün qurudulması təkcə ekoloji idarəçiliyin naqisliyi deyil, daha geniş siyasi planın bir hissəsidir. Hesabat verməyən rejimlərdə təbii sərvətlərin məqsədli şəkildə dağıdılması, demoqrafik dəyişikliklər və coğrafi mühəndislik uzun bir tarixə malikdir. İran İslam Respublikası rejimi də Urmu Gölü böhranını Güney Azərbaycanın qərb və mərkəzi bölgələrində demoqrafik tərkibi dəyişmək və Güney Azərbaycanın Türkiyə və Quzey Azərbaycan ilə geosiyasi bağlarını zəiflətmək üçün bir vasitəyə çevirmişdir. Aydındır ki, bölgədəki Türk dövlətləri ilə bağlı inkişaflar və Türk ölkələrinin ittifaqının güclənməsi İran coğrafiyasında Türk kimliyi tələblərini gücləndirmiş, bu isə rejimi dərin şəkildə qayğılandırmışdır. Belə bir şəraitdə İran rejimi daxilində bəzi güc mərkəzləri gölün qurumasını Azərbaycan Türklərinin məcburi köçürülməsi və milyonlarla insanın İranın mərkəzi bölgələrinə daşınması üçün fürsət hesab edirlər. İranda bəzi yüksək vəzifəli rəsmilərin Türkləri yad və düşmən adlandırması, rejimin anti-Türk siyasətləri və Pəhləvi üslubunda fars faşizminə dönüş bu ayrı-seçkilikçi baxışın dərinliyini göstərir. İslam Respublikası rejimi daxildə və xaricdə çoxsaylı varlıq böhranları ilə üzləşərkən və gələcəyi qeyri-müəyyən olarkən, görünür ki, rejim daxilində bəzi güc mərkəzləri bu cür qeyri-insani və cinayətkar metodlarla Güney Azərbaycan və Türk Milləti məsələsini “həll etmək” niyyətindədirlər ki, bu da uşaqcasına və axmaqlıqdan başqa bir şey deyil.
Azərbaycan Türk Milləti illərdir ki, vətəndaş, mədəni və ictimai etirazlarla gölün xilasını tələb edir. Amma İran İslam Respublikası zorakılıq və repressiyadan başqa heç bir cavab verməyib və müstəmləkəçi siyasətlərini davam etdirərək Azərbaycanın yeraltı, yerüstü və insan resurslarını talamasına baxmayaraq, Urmu Gölünü xilas etmək üçün heç bir addım atmayıb. Əksinə, çayların suyunu tamamilə kəsmək kimi addımlarla gölün qurudulması prosesini sürətləndirmişdir. Amma indi artıq Azərbaycan Türk millətinin səbri tükənib və xalqımızın səbr kasası dolmaq üzrədir; çünki faktiki olaraq duz fırtınaları Azərbaycanı ölümə sürükləyir.
Mütəxəssislərin fikrincə, Urmu gölü tam qurusa da yenidən dirçəldilə bilər; çünki gölün hövzəsi hələ də kifayət qədər yağıntıya malikdir və elmi metodlar tətbiq edilərsə, Urmu Gölü tədricən canlana bilər.
Biz Güney Azərbaycan Təşkilatları Əməkdaşlıq Şurası olaraq İran İslam Respublikasına rejiminə xəbərdarlıq edirik ki, Türk millətinin səbrini daha artıq sınamasın, çirkin planlarını kənara qoyaraq Urmu Gölünün xilas etmə layihəsini tez bir zamanda vicdanlı Azərbaycanlı mütəxəssislərə təhvil versin və onun büdcəsini də Azərbaycandan taladığı resurslardan təmin etsin. Əks halda, çox keçməz ki, Türk millətinin qəzəbli reaksiyası ilə üz-üzə qalacaq və şübhəsiz ki, bütünlükdə Azərbaycan Milli Hərəkatı bu meydanda millətimizin yanında olacaq.
“Güney Azərbaycan Təşkilatlarının Əməkdaşlıq Şurası”
1. Azərbaycan Demokrat Firqəsi – ADF
2. Azərbaycan Mərkəz Partiyası – AMP
3. Azərbaycan Milli Dirəniş Təşkilatı – Dirəniş
4. Azərbaycan Öyrənci Hərəkatı – AZOH
5. Güney Azərbaycan Cümhuriyyət Partiyası – ACP
6. Güney Azərbaycan Demokrat Partiyası – GADP
7. Güney Azərbaycan İstiqlal Partiyası – GAİP
8. Güney Azərbaycan Milli Dövlət Alyansı– MDA
9. Güney Azərbaycan Qurtuluş Partiyası – GAQP
