Güney Azərbaycan Təşkilatlarının Əməkdaşlıq Şurası (GATƏŞ) Olaraq İran Rejiminin Edam Basqılarını Şiddətlə Qınayırıq
Zorakılıq üzərində qurulmuş İranın fars mərkəzli dövlətçiliyi getdikcə daha da şiddət tətbiq edərək müxaliflərini susdurmağa çalışır. Son illərdə İran rejiminə qarşı narazılıq ciddi şəkildə artmış və artmaqdadır. Xüsusilə də qeyri-fars millət və toplumların milli ayaqlanma və dayanışması İran İslam rejimi üçün ciddi təhdidə çevrilmişdir. Fars olmayan millətlərin bütün varlıqlarını talayan, bölgə və dünyada terror və sabitsizlik yaradan İran rejimi, öz basqısı altında yaşayan millətlərin su və işıq kimi gündəlik ehtiyaclarını təmin edə bilmədiyi üçün, ümumi etirazlarla qarşılaşacağından qorxaraq, cəmiyyətdə qorxu yaratmaq məqsədilə ağır cəzalar tətbiq edərək mümkün etirazların qarşısını almağa çalışır.
BMT-nin hesabatına əsasən, İran rejimi son 9 ay ərzində 1000-dən artıq insanı qətlə yetirmişdir. Son həftələrdə isə bu rəqəm daha da artmış, hər gün orta hesabla 9 nəfər asılaraq edam edilmişdir. Güney Azərbaycan Təşkilatlarının Əməkdaşlıq Şurası (GATƏŞ) edam cəzasına qəti şəkildə qarşıdır və hər növ edamı insanlıq əleyhinə bir cinayət kimi məhkum edir. Xüsusilə də İran İslam Cümhuriyyəti rejimini zülmü altında yaşamağa məhkum edilmiş qeyri-fars millətlərin əsassız ittihamlarla həyata keçirilən edamlarını şiddətlə qınayır.
GATƏŞ, İran İslam Cümhuriyyəti rejiminin əsassız “casusluq” ittihamları ilə Güney Azərbaycan milli fəallarını ağır şəkildə cəzalandıraraq susdurmaq cəhdlərini pisləyir və qəhrəman millətimizi bu saxta sənədlərə inanmayaraq övladlarını müdafiə etməyə çağırır. GATƏŞ, saxta ittihamlara etiraz olaraq aclıq aksiyası keçirən məhbus milli fəalları dəstəkləyir və İran fars rejimini bu məhbusların sağlamlığından məsul tutur, eyni zamanda xəbərdarlıq edir. GATƏŞ bütün demokratik ölkələri, beynəlxalq təşkilatları və insan haqları mərkəzlərini edamların dayandırılması və bütün siyasi məhbusların qeyd-şərtsiz azad buraxılması üçün İran terror rejiminə təzyiq göstərməyə çağırır. GATƏŞ bəyan edir ki, İran adlanan ölkədə barış və sabitlik yalnız bu coğrafiyada yaşayan millətlərin öz talelərini azad iradə ilə müəyyən etməsi nəticəsində mümkündür.
“Güney Azərbaycan Təşkilatlarının Əməkdaşlıq Şurası – GATƏŞ”
1.Azərbaycan Demokrat Firqəsi – ADF
2.Azərbaycan Mərkəz Partiyası – AMP
3.Azərbaycan Milli Dirəniş Təşkilatı – Dirəniş
4.Azərbaycan Öyrənci Hərəkatı – AZOH
5.Güney Azərbaycan Cümhuriyyət Partiyası – ACP
6.Güney Azərbaycan Demokrat Partiyası – GADP
7.Güney Azərbaycan İstiqlal Partiyası – GAİP
8.Güney Azərbaycan Milli Dövlət Alyansı – MDA
9.Güney Azərbaycan Qurtuluş Partiyası – GAQP
